"तो".....माझ्या सगळ्या इच्छांसमोर गुडघे टेकतो
मला एखादी साडी मनापासून आवडलीये
हे त्याला ...नुसत्या डोळ्यांतून कळतं.
बाकी गिफ्ट्स वगैरे काही देत नाही
लाल गुलाब तर चुकून सुद्धा आणत नाही पण...
मोगऱ्याचा गजरा गुपचूप ठेवतो पूजेच्या फुलांच्या पुडीत...
बाईकवर त्याच्यापाठी बसले की
बिलगून बसलेलं मुळीच आवडत नाही त्याला...
एव्हढंच काय..खांद्यावर हातसुद्धा ठेवलेला चालत नाही
मात्र मी आजारी पडले तर ....हाताने तूप भात भरवतो
चारचौघात हातभर अंतर राखून वागतो पण;
कठीण प्रसंगात उभा असतो पाठीशी ...न सांगता
ते "तसलं" रोमँटिक वगैरे होणं जमत नाही त्याला
सतत कागदांवर आकडेमोड करत असतो..
कधी तरी डोळ्यांत प्राण आणून सांगतो
"माझ्या नंतरही तुला काही कमी पडायला नको"
माझी इवली स्वप्ने "तो" ...बांधून ठेवतो मनाच्या तळाशी
उतरवून ठेवतो डायरीत ....त्याच्या बकेट लिस्ट मध्ये.
माझ्या वेदना, माझं नेमकं दुःख मांडत नाही मी कधी
ते कळतं ..आपोआप त्याला ,मग...
टिपकागदासारखं टिपून घेतो "तो".
आंतरराष्ट्रीय राजकारणापासून ते अर्थसंकल्पांपर्यंतच्या
आमच्या गप्पांत "love you" वगैरे नसतं कधीच..
मला ठाऊक आहे ,त्याचं माझ्यावरचं नितांत प्रेम..
मला ते ऐकावं लागत नाही आणि
त्यालाही ते व्यक्त करावं लागतं नाही...
खरंखुरं हृदय देणाऱ्यांना ...काचेचं तकलादू हार्ट
विकत घ्यायला लागत नाही.
कधीकधी वाटतं...
बरं झालं!... "तो" माझा व्हॅलेन्टाईन
माझा नवरा रोमँटिक नाही..
✒️ यशश्री रहाळकर
कोणत्याही टिप्पण्या नाहीत:
टिप्पणी पोस्ट करा
आपल्या मौल्यवान प्रतिक्रियेसाठी मनापासून आभार ! वाचत रहा छानसे असेच काहीतरी... with kattayashashri तिचं कुंपण तिचं आकाश
धन्यवाद!