एकटीच ती

नव्या नवरीला औक्षण करण्या ती पुढे आली,
अन् एकच गलका.. ही विधवा हिनं आगळीक केली

लोकं शिकली,माणसं बदलली समाज तसाच आहे
तिच्या कर्तृत्वाची रेषा भाळावरील कुंकवात आहे.

ती अशीच एकाकी चौदा वर्षे जगते आहे..
तो अपघातात दगावला,... ती रोज रोज मरते आहे.

शुभ प्रसंगी टाळतात तिला सवयीचे झालेले
लोकांचे टोचून बोलणे अंगवळणी पडलेले

ती सुशिक्षित ,स्वावलंबी तिचेही जग काळे आहे.
अपमान,तिरस्कार अन् एकटेपणानं भरलं आहे.

तिची नवी साडी,दागिने एकटीने सिनेमाला जाणं..
खरंतर खटकतं लोकांना तिचे आत्मविश्वासानी जगणं

अधाशी नजर एखादी देहावरून फिरते जेव्हा
पांढऱ्या कपाळाचं दुःख पुन्हा पुन्हा बोचतं तेव्हा

तिचे सारेच ऋतू कोरडे उजाड ...
गाठीशी बांधलेला चिमूटभर भूतकाळ

दोन पिल्लांना एकटीच ती पंखाखाली झाकते
एकट्याच चोचीने आपलं घरटं ती राखते.

चेहऱ्यावर शांतभाव , खळबळ मनीच्या तळ्यात
अर्ध्या वाटेवर भैरवी लागली केहेरवा कानी तसाच

कधीतरी ती स्वतःला खोलीत  कोंडून घेते
मनातल्या सरी मनसोक्तपणे बरसू देते...

डोळे पुसून बाहेर येते पुन्हा प्रसन्न चेहऱ्याने
अन् मुलांचा बाप होते खंबीर कठोर मनाने
©🔏 यशश्री रहाळकर

(तिचे वैधव्य तिचे पाप नाही... तिचे एकटेपण शाप नाही... नवे संक्रमण करूया प्रत्येक स्त्री चा  ह्या लेबल पलीकडे सन्मान करूया!👍 हळद स्त्री च्या समर्पणाचं तर कुंकू तिच्या त्यागाचं प्रतीक आहेत... स्त्रीत्वाचा सन्मान करूया..💐 मकर संक्रांतीच्या हार्दिक शुभेच्छा!💐)