पर्स
पर्सची बाह्य किंमत काहीही असू देत,
त्यावर फारसं काही वेगळं नसतं
रंग ,रूप, आकार ह्यांपलिकडे...
प्रत्येक पर्सचं एक वय असतं..💝
पैसा खूप काही देतो, चॉकलेट्स, बाहुली...
हे जेव्हा इवल्याश्या पर्सला कळू लागतं..
तेव्हा खेळण्यातले खोटे पैसे, रुमाल खाऊ
ठेवते, बागडते पर्स ,जाईल तिकडे.
कॉलेजला जाऊ लागली की
पर्स लिपस्टिकस् ,कॉम्पॅक्ट, परफ्यूम..
आणि काय काय मिरवते...
दडवून ठेवते एखादा गुलाब
आणि लपवून ठेवते एखादं प्रेमपत्र ..
पर्स नोकरदार असेल तर कामांच्या नोंदी..
आर्थिक स्वातंत्र्याची ATM कार्डस् असतात
पर्स गृहिणी असेल तर सुट्टे पैसे आणि
वाणसामानाच्या याद्या नि पावत्या असतात
जबाबदारीच्या घराच्या किल्ल्या मात्र
दोन्हीकडे सारख्याच असतात..
लेकुरवाळ्या पर्समध्ये मातृत्वाचं भंडार असतं
बाळाचे कपडे, डायपर, फूड, पाणी..
एक अख्ख दुकान असतं.
उतारवयात औषधे, डॉक्टरचे संपर्क ,प्रिस्क्रिप्शन
घेऊन फिरते थकलेली जीर्ण पट्ट्यांची पर्स.
पैसा, सौंदर्य, काळजी, मातृत्व, आरोग्य..
सारं सारं स्वतःमधील इतरांना वाटून देत ,
आता पर्स पुरती रिकामी झालेली असते
अखेरच्या दिवसांत पर्सला कळून चुकतं
सगळ्यांत मौल्यवान ठेवा असणाऱ्या
स्वतःला सांभाळायचं.. राहूनच गेलेलं असतं 😢😢
✒️©️ यशश्री रहाळकर
कोणत्याही टिप्पण्या नाहीत:
टिप्पणी पोस्ट करा
आपल्या मौल्यवान प्रतिक्रियेसाठी मनापासून आभार ! वाचत रहा छानसे असेच काहीतरी... with kattayashashri तिचं कुंपण तिचं आकाश
धन्यवाद!